Xornada inaugural da XXIII Semana de Cine Euroárabe AMAL: Proxección do documental “This is Gaza” e coloquio posterior co seu protagonista Yousef Hammash e a xornalista Olga Rodríguez

AMAL 2025 inaugurarase o luns 20 de outubro con “This is Gaza”, documental narrado polo xornalista Yousef Hammash nos primeiros seis meses da ofensiva israelí en Gaza tralo estalido do 7 de outubro de 2023 [20 horas no Teatro Principal]

Trala proxección, celebrarase un coloquio entre o propio Hammash, gañador de varios premios internacionais, e a xornalista Olga Rodríguez, cofundadora de eldiario.es

A asistencia é gratuíta, previa retirada de invitación en Ataquilla.com ou no despacho de billetes do teatro, unha hora antes da sesión

A Semana de Cine Euroárabe AMAL 2025 dará comezo o vindeiro luns 20 coa súa xornada inaugural, ás 20:00 horas no Teatro Principal. Proxectarase o documental “This is Gaza”, producido este 2025 por Channel 4 (canle de televisión pública británica en aberto), dirixido por Tom Besley e protagonizado polo cineasta e xornalista Yousef Hammash. As gravacións foron realizadas durante os seis primeiros meses tralo 7 de outubro de 2023 polo propio Yousef, cando se iniciou a ofensiva israelí contra o territorio de Gaza. Conta a historia do mesmo Yousef fuxindo xunto a súa familia da destrución do seu propio fogar. Mentres viaxa cara o sur, en dirección ao Paso de Rafah, grava o antes, durante e despois da cadea sísmica de eventos provocados trala tráxica data de outubro.

A asistencia é gratuíta, previa retirada de invitación en Ataquilla.com ou no despacho de billetes do Teatro Principal, unha hora antes da sesión.

Tras ver o filme, celebrarase un coloquio co xornalista e protagonista do documental “This is Gaza”, Yousef Hammash, e a xornalista Olga Rodríguez.

Yousef Hammash é un xornalista e cineasta palestino procedente do campamento de Jabalia en Gaza que actualmente vive en Londres e traballa como produtor no Channel 4. Foi distinguido cun premio BATFA en 2024, un Emmy internacional, un FPA, un RTS, un One World Media, un premio British Journalism e un premio Marie Colvin, coñecido polos seus aclamados documentais “Gaza”, “One Day in Gaza”, “Gaza: Daring to Dream”, “This is Gaza” e “Gaza: How to Survive a Warzone”.  

Olga Rodríguez (León, 1975) é unha xornalista e escritora especializada en información internacional, Oriente Medio e Dereitos Humanos. Cubriu algúns dos acontecementos máis importantes de ámbito internacional deste século. É cofundadora do medio dixital eldiario.es, co que continúa colaborando actualmente, pero, ademais traballou na Cadena SER, formou parte do equipo fundador de Cuatro, e tamén exerceu de xornalista na y CNN+

Destacan as súas crónicas desde Iraq en 2003, onde é testemuña dos últimos días do réxime de Sadam Hussein, da invasión e ocupación do país e da morte de José Couso. Recibe o Premio Turia ao Mellor Labor en Medios de Comunicación 2003 polo seu traballo desde Iraq e o Premio Ortega e Gasset 2003 colectivo. Tamén salientan os seus traballos sobre as revoltas árabes en Exipto en 2011, por ter acceso a movementos sociais e activistas cos que xa mantivera encontros desde 2004; e outras reportaxes desde territorios palestinos, Afganistán ou Siria e dos seus refuxiados.  Recibe outros recoñecementos como o Premio Enfoque 2014, Premio Asociación Pro Dereitos Humanos 2015, Premio Lupa 2016 e Premio Honoris Causa Pimentel Fonseca 2018 (Italia).

É autora de varios libros: “El hombre mojado no teme la lluvia. Voces de Oriente Medio” (Debate, 2009), guía clave para comprender Oriente Medio, non só a nivel político, senón tamén as súas xentes; ou “Yo muero hoy. Las revueltas árabes” (Debate, 2012), entre outros. 

Xornada inaugural: Proxección do documental “This is Gaza” (DOC) e asistencia do seu protagonista Yousef Hammash e da xornalista Olga Rodríguez  

“This is Gaza”| Documental | Tom Besley | 2025  | Reino Unido | 50‘

Mergulla aos espectadores no corazón do conflito de 2023 entre Israel e Hamás a través dos ollos de Yousef, un xornalista palestino cuxa vida en Gaza se transforma irrevogablemente. O filme comeza cunha conmovedora ollada á vida de Yousef no campo de refuxiados de Jabalia, un lugar definido por un forte sentido de comunidade e a alegría atopada en sinxelas celebracións. Esta existencia idílica faise anacos sen aviso co comezo da ofensiva israelí asolagando Gaza nun tornado de violencia. Yousef e a súa familia vense obrigados a fuxir da súa casa, escapando por pouco da súa destrución nun devastador bombardeo. De súpeto, vese empuxado ao papel de testemuña, documentando o horror que se desenvolve ao seu redor.

Tom Besley é un cineasta documentalista e xornalista de Londres cunha salientable traxectoria en medios como a BBC, The New York Times Op-Docs, Channel 4 e VICE. En "This is Gaza", Yousef Hammash, que forma parte do equipo de Channel 4 News que gañou premios Emmy e BAFTA polas súas reportaxes sobre a guerra entre Israel e Hamas, sae por primeira vez diante da cámara para contar a súa historia dende a Franxa de Gaza. Tom Besley foi seleccionado para a lista longa (Longlist) dos Premios Rory Peck na categoría de Xornalista freelance.

Venda de entradas en Ataquilla.com

Amal 2025 celebrarase entre o 20 e o 24 de outubro no Teatro Principal de Santiago (rúa Nova, 21) coa exhibición de cinco cintas –catro documentais e unha longametraxe de ficción– que se poderán ver nun pase único por día de luns a venres. Trala proxección do luns, a semana continuará con sesións ás 21:00 horas. O martes proxectarase o documental “Janin, Jenin”, ás 21:00 horas, sesión á que asistirá o actor palestino Saleh Bakri; o mércores a ficción “The time that remains”, ás 21:00 horas, que contará tamén coa asistencia de Saleh Bakri; o xoves o documental “Notes on displacement”, ás 21:00 horas, onde participará o presidente de honra da Fundación Araguaney-Puente de Culturas, Ghaleb Jaber Ibrahim; e finalmente, o venres pecharase o festival co documental “The encampments”, ás 21:00 horas, cita á que asistirá o director do Festival Amal e presidente da Fundación Araguaney-Puente de Culturas, Ghaleb Jaber Martínez.

As entradas de martes a venres terán un custo de tres euros (+ gastos de xestión) e estarán á venta en Ataquilla.com en Ataquilla.com. Tamén as entradas restantes poderanse adquirir no despacho de billetes do Teatro Principal, unha hora antes de cada proxección.